Bókun 35 úr nefnd með stuðningi Þórdísar Kolbrúnar

Sæki samantekt...

Meirihluti utanríkismálanefndar afgreiddi frumvarp um Bókun 35 úr nefnd í gærkvöldi. Fyrrum utanríkisráðherra Sjálfstæðisflokksins, sem upphaflega lagði frumvarpið fyrir Alþingi, skrifar undir nefndarálitið ásamt fulltrúum meirihlutans í nefndinni.

Bókun 35 var lagt fram á þingi á síðasta kjörtímabili en kom aldrei til afgreiðslu og var þetta eitt af fyrstu þingmálum Þorgerðar Katrínar Gunnarsdóttur nýs utanríkisráðherra.

Frumvarpið felur í stuttu máli að ef lagaákvæði sem byggir á EES samningnum er ósamrýmanlegt öðru lagaákvæði skuli hið fyrrnefnda ganga framar, nema að Alþingi mæli fyrir um annað. Á þetta að tryggja að einstaklingar og fyrirtæki njóti að fullu þeirra réttinda sem EES-samningurinn tryggir.

Frumvarpið er og hefur verið umdeilt og eru uppi raddir um að frumvarpið feli í sér svo mikið framsal fullveldis að stjórnarskrárbreytingu þurfi til að innleiða bókunina.

Í áliti meirihluta nefndarinnar segir að það liggi fyrir að bókunin hafi ekki verið innleidd í lög með réttum hætti. Sé það ekki gert fólk og fyrirtæki orðið af þeim réttindum sem EES-samningurinn eigi að tryggja þeim og eina leið þeirra til að fá þeim rétti fullnægt sé að höfða skaðabótamál á hendur íslenska ríkinu, sem sé ótækt.

Undir meihlutaálitið skrifa fulltrúar stjórnarflokkanna í nefndinni auk Þórdísar Kolbrúnar Reykfjörð Gylfadóttur, þingmanns Sjálfstæðisflokksins. Hún lagði frumvarpið fram sem utanríkisráðherra á síðasta kjörtímabili. Hinn fulltrúi Sjálfstæðisflokks í nefndinni, Diljá Mist Einarsdóttir, skrifar ekki undir.

Miðflokkurinn hefur barist hvað harðast gegn málinu en þess má geta að það var þingmaður flokksins, Sigríður Á. Andersen, sem ásamt fleirum skrifaði frumvarpsdrögin á sínum tíma. Það var áður en hún gekk til liðs við Miðflokkinn.