Guðmundur Ari segir galið af Rósu að sitja áfram

Sæki samantekt...

„Þetta er svo galið,“ segir Guðmundur Ari Sigurjónsson, þingmaður Samfylkingarinnar, um að Rósa Guðbjartsdóttir, þingmaður Sjálfstæðisflokksins og bæjarfulltrúi í Hafnarfirði, ætli að halda áfram í stjórn Sambands íslenskra sveitarfélaga.

Bæði voru kosin á þing í vetur og sagði Guðmundur Ari sig þá úr bæjarstjórn og úr stjórn Sambands íslenskra sveitarfélaga.

Rósa sagði í samtali við fréttastofu í morgun að hún ætlaði ekki að hætta í stjórn Sambands íslenskra sveitarfélaga fyrir landsþing þess á fimmtudag. Hún sagðist þó ekki gera ráð fyrir að sitja allt kjörtímabilið til enda sem bæjarfulltrúi. Ef hún hættir í bæjarstjórn hættir hún um leið í stjórn sambandsins þar sem aðeins kjörnir fulltrúar og varafulltrúar í sveitarstjórnum eru gjaldgengir í stjórn.

Vill skil milli ríkisvalds og sveitarfélaga

Guðmundur Ari deildi frétt RÚV um ákvörðun Rósu á Facebook í morgun. Þar skrifar hann að eitt af meginmarkmiðum Sambands íslenskra sveitarfélaga felist í hagsmunagæslu sveitarfélaganna gagnvart ríkisvaldinu.

Skjáskot/Facebook

„Það að þingmaður sitji í stjórn sambandsins er algjör hagsmunaárekstur og trúnaðarbrestur við sveitarfélögin í landinu. Þessi ákvörðun Rósu setur alla stjórnina í skrýtna stöðu þar sem þau trúnaðarsamtöl sem fram fara í stjórn Sambandsins fara nú fram með fulltrúa Alþingis á fundunum.“

Guðmundur Ari segir að formaður og stjórn sambandsins þurfi að geta ráðið ráðum sínum og átt trúnaðarsamskipti án þess að þurfa að gæta að því að fulltrúar þingsins séu viðstaddir.

„Það var eftirminnilegt á síðasta kjörtímabili þegar Bjarni Jónsson fulltrúi VG í stjórn Sambandsins var kjörinn á þing þá hneyksluðust fulltrúar Sjálfstæðismanna mikið á því að hann sagði sig ekki strax úr stjórn Sambandsins. Ég skil það vel enda sat ég sjálfur í stjórn Sambandsins þegar ég var kjörinn á þing og sagði mig strax úr stjórninni.“

„Hvernig getur einstaklingur í fullu starfi á Alþingi mætt á sama tíma á bæjarstjórnarfundi, nefndarfundi og fundi í stjórn Sambandsins?“

Rósa sagði í samtali við fréttastofu í morgun að hún yrði í stjórn sambandsins allavega næstu vikurnar. Hún sagðist ekki gera ráð fyrir að sitja í bæjarstjórn þar til kjörtímabilinu lýkur á næsta ári heldur gerði hún ráð fyrir að hætta þar á næstu vikum eða mánuðum.

Breytingar á stjórn

Kjósa þarf nýja fulltrúa í stjórn Sambands íslenskra sveitarfélaga á þinginu á fimmtudag í stað Guðmundar Ara og í stað Heiðu Bjargar Hilmisdóttur borgarstjóra sem tilkynnti í gær að hún hætti sem formaður sambandsins. Einnig þarf að kjósa nýjan varamann í stjórn í stað Dags B. Eggertssonar, þingmanns Samfylkingarinnar og fyrrverandi borgarfulltrúa.