Þriðjungur telur afsögn Ásthildar Lóu hafa verið rétta ákvörðun

Sæki samantekt...

Afsögn Ásthildar Lóu Þórsdóttur, mennta- og barnamálaráðherra, var rétt ákvörðun að mati 74% svarenda í nýrri könnun Maskínu. Þetta kemur fram í frétt á vef Vísis.

26% svarenda segja ákvörðun hennar um afsögn hafa verið ranga.

Í könnuninni var fólk spurt um afstöðu til afsagnar Ásthildar Lóu og hvort því hefði fundist fréttaflutningur um mál hennar hafa verið sanngjarnan eða ósanngjarnan.

55% svarenda finnst fréttaflutningurinn hafa verið ósanngjarn, 30% finnst hann hafa verið sanngjarn og 15% svöruðu því til að hann hefði verið í meðallagi.

Þátttakendur voru einnig spurðir að því hvort að Ásthildur Lóa ætti að segja af sér þingmennsku. 70% svöruðu þeirri spurningu neitandi.

981 tók þátt í könnuninni sem fór fram frá 27. mars til 3. apríl.

Sagði af sér embætti í kjölfar fréttaflutnings

Ásthildur Lóa sagði af sér embætti ráðherra í kjölfar fréttaflutnings af því að hún hefði eignast barn með sextán ára pilti.

„Þetta persónulega mál mitt sem er orðið 35 ára gamalt á ekki að skyggja á þau góðu störf sem ríkisstjórnin er að gera. Þau eru mikilvægari en málefnin sem ég er að vinna að inni í menntamálaráðuneyti, sem ég sé mjög eftir að geta ekki klárað,“ sagði Ásthildur Lóa í viðtali þar sem hún greindi frá afsögn sinni.

Viku áður hafði forsætisráðuneytið fengið upplýsingar um málið frá konu sem misbauð það að Ásthildur Lóa Þórsdóttir væri í embætti barnamálaráðherra.

Ráðherrann hafði samband við konuna, eftir að forsætisráðuneytið hafnaði beiðni hennar um fund.