Ingibjörg verður landsliðsfyrirliði í næstu leikjum

Sæki samantekt...

Ljóst er að fyrirliðinn Glódís Perla Viggósdóttir er frá vegna meiðsla. Ingibjörg hefur verið varafyrirliði liðsins í þó nokkurn tíma og því eru allar líkur á því að hún leiði íslenska liðið gegn Noregi á föstudaginn.

Ingibjörg fagnar fyrsta landsliðsmarki sínu gegn Þýskalandi á Laugardalsvelli í júlí 2024 RÚV/Mummi Lú

Glódís missir hins vegar nær aldrei af verkefnum og hefur tekið þátt í öllum landsliðsverkefnum Íslands frá því að hún tók við fyrirliðabandinu. Hún bar fyrirliðabandið fyrst í febrúar árið 2023.

Ingibjörg og Glódís hafa myndað miðvarðateymi Íslands síðustu árin. Ingibjörg hefur leikið 70 landsleiki og skorað í þeim tvö mörk.

Ísland mætir Noregi 4. apríl klukkan 15:45 á Þróttaravelli. Þá mætir liðið Sviss þriðjudaginn 8. apríl klukkan 16:45.

Báðir leikirnir eru sýndir beint á RÚV.