Um 1.700 látnir eftir jarðskjálftann – stórir eftirskjálftar mælast

Sæki samantekt...

Um sautján hundruð hafa fundist látin í Mjanmar eftir jarðskjálfta af stærðinni sjö komma sjö á föstudag. 300 manns er enn saknað. Eftirskjálfti af stærðinni 5,1 varð í morgun.

Yfirmaður hersins í Mjanmar upplýsti forsætisráðherra landsins um tölu látinna í símtali. Hann sagði um 3.400 slasaða eftir jarðskjálftann á föstudag og varaði við því að enn fleiri gætu fundist látnir.

Björgunarsveitir leita í rústum húsa sem hrundu í jarðskjálftanum. Í Mandalay, næststærstu borg Mjanmar, sem er nærri upptökum skjálftans, bárust fréttir af því að slökkvilið hafi bjargað 29 úr rústum fjögurra blokka sem kallast Sky Villa. Níu lík hafa einnig fundist.

Í gær var konu bjargað úr húsarústunum eftir að hafa verið föst þar í um 30 klukkustundir. Talsmaður Rauða krossins sagði við AFP-fréttaveituna að allt að 90 manns gætu enn verið föst í rústunum.

Í Bangkok í Taílandi, nágrannaríki Mjanmar, hafa sautján hið minnsta fundist látin, í háhýsi sem hrundi í skjálftanum, hafa ellefu fundist látin. 83 er saknað í borginni eftir skjálftann.

Eftirskjálftar hafa einnig orðið í kjölfar stóra skjálftans og í morgun varð skjálfti af stærðinni fimm komma einn tæplega þrjátíu kílómetra norðvestur af Mandalay. Annar skjálfti af stærðinni fjórir komma tveir mældist um miðnætti.