Leiðtogi Írans vill ekki semja við Trump

Sæki samantekt...

Ali Khamenei, æðsti leiðtogi klerkastjórnarinnar í Íran, hefur ekki áhuga á að semja við Bandaríkin um írönsku kjarnorkuáætlunina. Hann telur Bandaríkin ekki hafa áhuga á að leysa nein vandamál, aðeins á að fá vilja sínum framgengt.

Donald Trump Bandaríkjaforseti greindi frá því í viðtali við Fox Business á föstudaginn að hann hefði sent írönskum stjórnvöldum bréf þar sem hann bauð upp á samningaviðræður og sagði hinn kostinn vera stríð. Þá sagði hann að það myndi reynast Íran mun betur að semja og að Íran mætti ekki komast yfir kjarnorkuvopn.

Íran gerði áður samning við Bandaríkjastjórn um kjarnorkuáætlun þeirra árið 2015, í stjórnartíð Baracks Obama. Sá samningur fól í sér takmarkanir á kjarnorkuáætlun landsins í skiptum fyrir að ýmsum viðskiptaþvingunum gegn landinu var aflétt. Donald Trump dró stuðning Bandaríkjanna við samninginn til baka á fyrra kjörtímabili sínu árið 2018 og setti viðskiptaþvinganir aftur á Íran. Tilraunir Joe Biden til að koma samkomulaginu aftur í gildi á kjörtimabili sínu báru ekki árangur.

Í gær sagðist stjórn Írans ekki hafa fengið neitt bréf frá Trump en Khamenei tjáði sig þó um möguleikann á samningaviðræðum við hóp af embættismönnum, án þess að nefna Bandaríkin á nafn. „Sumar eineltisstjórnir krefjast samningaviðræðna,“ sagði hann.

„En samningaviðræður þeirra snúast ekki um að leysa vandamál, heldur um að knésetja og fá vilja sínum framgengt. […] Fyrir þeim eru samningaviðræður bara verkfæri til að koma með nýjar kröfur. Málið snýst ekki bara um kjarnorkumál, heldur koma þeir með nýjar væntingar sem Íran mun sannarlega ekki koma til móts við.“

Í andsvari sínu til Trumps lagði Khamenei áherslu á að á kjörtímabili Hassans Rouhani Íransforseta hefði Íran haldið áfram að „umbera“ gamla samkomulagið í eitt ár áður en ríkið dró einnig stuðning sinn við það til baka með lagafrumvarpi árið 2019.