Ríkisstjórnin samhljóma um starfsmannalögin

Sæki samantekt...

Daði Már Kristófersson, fjármála- og efnahagsráðherra, telur tímabært að endurskoða starfsmannalögin varðandi brottfall áminningarskyldunnar. Hann segir samhljóm innan ríkisstjórnarinnar um það.

Var það á meðal tillagna hagræðingarhóps á vegum ríkisstjórnarinnar að falla skyldi frá áminningarskyldunni.

mbl.is ræddi við Daða um málið að loknum ríkisstjórnarfundi í dag.

Löngu tímabært að endurskoða lögin

Ert þú áfram um tillögu hagræðingarhópsins varðandi áminningarskylduna?

„Það hefur verið markmið á íslenskum vinnumarkaði núna í að verða áratug að reyna að jafna aðstöðu á milli markaða. Og það er líka ljóst að lög um réttindi og skyldur opinberra starfsmanna eru orðin gömul og að það eru margir hlutir sem hafa bæst við. Almenn réttindi á vinnumarkaði hafa þróast. Það er löngu orðið tímabært að endurskoða lögin,“ segir ráðherrann og heldur áfram:

„Það hefur hins vegar reynst stjórnvöldum mjög erfitt að taka þetta upp. Þetta er viðkvæmt, eðli málsins samkvæmt, en ég er þeirrar skoðunar að það sé orðið tímabært að endurskoða þessi lög.“

Yrði í samráði við þá sem löggjöfin snertir

Myndirðu segja að það sé samhljómur um það innan ríkisstjórnarinnar?

„Já, ég held það, eða ég held ekkert um það, já, það er það,“ segir Daði.

„Það er hins vegar líka alveg ljóst að þrátt fyrir að menn tali digurbarkalega á Alþingi um það að ráðast gegn hagsmunum starfsmanna að þá er það vanalega aldrei gert heldur gerir ríkið breytingar á svona lögum í samráði við þá sem löggjöfin snertir.“

Þannig að það verða samskipti þarna á milli að þetta verði gert í svona ákveðinni sátt, eins mikið og hægt er?

„Í samráði við aðila sem verða fyrir áhrifum af lagabreytingu.“

Jafngildir stríðsyfirlýsingu

Þess ber að geta að Sonja Ýr Þorbergsdóttir, formaður BSRB, hefur sagt tillögu hagræðingarhópsins jafngilda stríðsyfirlýsingu.

Kolbrún Halldórsdóttir, formaður BHM, hefur einnig sagst vera ósátt með hugmyndir um að áminningarskyldan verði fjarlægð úr starfsmannalögunum.