Rannsaka dularfulla söluaukningu Tesla

Sæki samantekt...

Kanadísk yfirvöld ætla að rannsaka grunsamlega aukningu í sölum á rafmagnsbílum frá Tesla sem mældist rétt áður en hlé var gert á veitingu ríkisstyrkja fyrir seljendur rafmagnsbíla í janúar. Á aðeins þremur dögum fyrir lok styrkveitingarinnar tilkynnti Tesla um sölu 8.600 bíla í fjórum bílabúðum í landinu. Þessi sala skilaði fyrirtækinu styrkjum að andvirði 43,1 milljóna Kanadadala, eða um fjögurra milljarða íslenskra króna.

Samtök kanadískra bifreiðasala (Canadian Automobile Dealers Association) eru meðal þeirra sem telja hér maðk í mysunni. Samtökin hvöttu flutningastofnun ríkisins, Transport Canada, til að hefja rannsókn og ganga úr skugga um hvort Tesla væri að hagræða tölum til að tryggja sér styrkina.

Kanadíski fréttamiðillinn Toronto Star er meðal þeirra sem greina frá grunsemdum annarra bílasala, sem telja Tesla hafa leikið á kerfið á þeirra kostnað. Þar sem Telsa hreppti síðustu styrkina áður en hætt var að veita þá telja aðrir bílasalar sig hafa verið féfletta.

Fleiri miðlar leiða líkur að því að eitthvað gruggugt sé við sölutölurnar. Bílafréttamiðlinum Motor Illustrated telst svo til að ein bílabúð Tesla hafi tilkynnt 1.200 sölur á aðeins einum degi. Annar slíkur miðill, CarScoops, reiknar út að samkvæmt skráningum Tesla hafi verslanirnar fjórar, hver um sig, selt að meðaltali 30 bíla á klukkustund, þrjá daga í röð.

Þessi skyndilega sprenging í Teslusölum er enn eftirtektarverðari í ljósi þess að sölur fyrirtækisins hafa verið á hraðri niðurleið í Kanada að undanförnu. Sölutíðni á rafbílum Tesla hrapaði um 70 prósent í Kanada frá desember 2024 til 2025, að því er segir á vef National Post. Líkur hafa verið leiddar að því að skýringin sé reiði Kanadamanna í garð framkvæmdastjóra Tesla, Elon Musk.

Musk gegnir lykilhlutverki í ríkisstjórn Donalds Trump Bandaríkjaforseta, sem hefur ítrekað beint spjótum sínum að Kanada síðan hann tók við embætti og hefur hótað að innlima landið og gera það að 51. ríki Bandaríkjanna. Undirskriftasöfnun til ríkisstjórnarinnar um að Musk verði sviptur kanadískum ríkisborgarétti sínum náði 250 þúsund undirskiftum á innan við viku í febrúar. Lét þá Musk þau orð falla að Kanada væri hvort eð er ekki alvöru ríki.