Hlynntur vopnahléi með ákveðnum skilyrðum

Sæki samantekt...

Vladimír Pútín Rússlandsforseti er hlynntur 30 daga vopnahléi milli Rússlands og Úkraínu en segir stórum spurningum enn ósvarað sem hann þurfi að ræða við Bandaríkjastjórn. Mögulega þurfi hann að ræða málið við Donald Trump Bandaríkjaforseta símleiðis.

Þetta kom fram á blaðamannafundi Pútíns í Moskvu þar sem hann brást við tillögum Bandaríkjamanna að vopnahléi á milli Úkraínu og Rússlands. Steve Witkoff, sérstakur erindreki Bandaríkjamanna kynnir efni samningsins fyrir rússneskum embættismönnum síðar í dag.

Fyrr í dag sagði talsmaður Rússlandsforseta tillöguna aðeins til þess fallna að veita Úkraínumönnum andrými. Úkraínsk yfirvöld hafa nú þegar sagst vera samþykk tillögunni.

Pútín sagði vopnahléssamkomulag verða að leiða til langtímalausnar á deilu Rússlands og Úkraínu. Fjalla þyrfti um frumorsök deilunnar með slíku samkomulagi.

Pútín hrósaði hermönnum rússneska hersins á blaðamannafundinum í dag. Hann sagði næstu skref ráðast af því hvernig til tækist við að brjóta á bak aftur sókn Úkraínumanna inn í Kúrsk hérað. Forsetinn sagði hermenn sína hafa orðið vel ágengt í héraðinu á síðustu dögum og raunar á allri víglínunni.

Úkraínumenn hófu óvænta sókn sína inn í Kúrsk-hérað fyrst í ágúst í fyrra. Þeim tókst að ná yfirráðum yfir talsverðu landsvæði í héraðinu. Á síðustu dögum hafa rússneskar hersveitir endurheimt hvert þorpið á fætur öðru. Í morgun greindu rússnesk stjórnvöld frá því að þau hefðu náð bænum Sudzha aftur á sitt vald.