Utanríkisráðuneytið gefur út ferðaleiðbeiningar fyrir hinsegin fólk

Sæki samantekt...

Utanríkisráðuneytið undirbýr ferðaleiðbeiningar fyrir hinsegin fólk. Utanríkisráðherra segir hinsegin fólk þurfa að hafa varann á. Formaður Samtakanna ‚ 78 segir mikilvægt að fólk hafi hugmynd um hvernig það geti verið að ferðast til Bandaríkjanna.

Hafa fengið fyrirspurnir frá hinsegin fólki sem óttast að ferðast

Margar þjóðir Evrópu, meðal annars Danmörk og Finnland hafa gefið út nýjar ferðaleiðbeiningar fyrir trans fólk sem ætlar að ferðast til Bandaríkjanna vegna stefnubreytinga stjórnvalda þar. Fáheyrt er að íslensk stjórnvöld gefi út ferðaleiðbeiningar, alla jafna fylgir Ísland leiðbeiningum Norðurlandanna.

Þorgerður Katrín Gunnarsdóttir, utanríkisráðherra segir leiðbeiningarnar í smíðum, meðal annars í samvinnu við Samtökin ‚ 78.

„Við erum að fá nokkrar fyrirspurnir frá hinsegin fólki sem er í ákveðinni óvissu og óttast að einhverju leyti að ferðast og þetta er ferðaleiðarvísir fyrir hinsegin fólk á ferðalögum.“

Þorgerður segir stjórnvöld verða að taka því bakslagi sem orðið hefur í réttindum hinsegin fólks um allan heim alvarlega.

„Og ekki bara það, við verðum að vinna í því að tryggja fólkinu okkar, Íslendingunum okkar, þetta öryggi sem það á rétt á.“

Ekki er ljóst hvenær leiðbeiningarnar verði tilbúnar en Þorgerður segir að það verði fyrr en síðar. „Það þarf að gera allt sem við getum gert til að eyða óvissu og óöryggi.“

Þarf fólk að óttast?

„Það þarf að hafa varann á. Stjórnvöld hverju sinni þurfa að gera það sem þau geta innan stjórnsýslunnar en síðast en ekki síst þarf ríkisstjón hverju sinni, og utanríkisráðherra, að tala mjög skýrt um það að ísland gefi hvergi eftir þegar kemur að þessum grundvallargildum um lýðræði, frelsi og ekki síst mannréttindi allra.“

Að einhverju leyti léttir að þetta er öllum ljóst

„Þetta er virkilega mikilvægt, að fólk hafi hugmynd um hvernig getur verið að ferðast til Bandaríkjanna núna. Ástandið er óöruggt,“ segir Bjarndís Helga Tómasdóttir, formaður Samtakanna ‚ 78.

Samtökin hafa haft áhyggjur af bakslagi í réttindabaráttu hinsegin fólks lengi.

Bjarndís Helga Tómasdóttir, formaður Samtakanna 78. Asðend/Samtökin ‚ 78

„Við höfum áhyggjur af ástandinu og við höfum haft áhyggjur af þessu ástandi mjög lengi og að einhverju leyti er léttir að núna er þetta öllum ljóst. Þá getum við gert eitthvað.“

Samtökin blésu til Landsþings hinsegin fólks sem lauk í dag. Yfirskriftin í ár var Viðnám, barátta í breyttum heimi.

„Við vildum bara bregðast við því, við vildum bjóða félagsfólki okkar tækifæri til að koma saman og hittast, hafa að sjálfsögðu gaman líka en fara aðeins í gegnum hlutina. Hvernig tæklum við þetta ástand? Hvað getum við raunverulega gert? Hvernig getum við brugðist við? Og skapa samtal í kringum það líka, meðal okkar fólks.“