Óvissa eins og á jarðhræringasvæði

Sæki samantekt...

Við erum í óvissu líkt og á jarðhræringasvæði, segir framkvæmdastjóri Samtaka fyrirtækja í sjávarútvegi um innflutningstolla til Bandaríkjanna. Minni kaupmáttur í Bandaríkjunum geti leitt til þess að neytendur dragi úr fiskneyslu.

„Ég myndi halda að fyrstu viðbrögð séu að við erum bara í áframhaldandi óvissu þetta er eiginlega eins og að vera á jarðhræringasvæði, sem við svo sem þekkjum, en þá í viðskiptalegu tilliti,“ segir Heiðrún Lind Marteinsdóttir.

Þverrandi kaupmáttur gæti dregið úr fiskneyslu

Hún segir að að einhverju leyti megi anda léttar að Ísland er í lægsta þrepi, 10%, en áhyggjuefni að verið sé að leggja mikla tolla á innflutning til Bandaríkjanna sem þýði að verð á nánast öllu hækki. Það þýði þverrandi kaupmátt þar og neytendur láti budduna frekar ráða hvað sé keypt og hverju sé sleppt.

„Og við vitum það bara með sjávarafurðir að þeir eru viðkvæmir fyrir öllum verðhækkunum. Þannig að hættan er auðvitað sú að neytendur fari að skipta yfir í annars konar og ódýrara prótein, það er bara samkeppni sem við stöndum frammi fyrir bara veruleiki sem verður í Bandaríkjunum á næstu misserum.“

Spurning hvort framboð aukist í Evrópu vegna minni sölu í Bandaríkjunum og lækki verð

Þá sé ástæða til að hafa áhyggjur af að aðrar þjóðir og Evrópusambandið fái á sig hærri tolla. Vitað sé að norskur fiskur sé fluttur til Póllands til vinnslu og þaðan fluttur til Bandaríkjanna með 20% tolli. Einhverjir myndu halda að það væru gott fyrir samkeppnisstöðu okkar.

„En hættan er auðvitað sú að fiskur verði þá afsettur á aðra markaði og jafnvel okkar enn sterkari markaði sem eru inni í Evrópu og verð fari þá lækkandi þar. Þannig, eins og ég segi, þetta er bara allt á hreyfingu akkúrat núna og við vitum í raun ekkert hvað verður, það verður eiginlega bara að bíða og sjá. En sjávarútvegur bara þekkir þetta og við þessum þurfum við bara að bregðast.“