Nýr mennta­mála­ráð­herra og flugvélaflaksbýtti

Sæki samantekt...

Guðmundur Ingi Kristinsson tók við sem mennta- og barnamálaráðherra síðdegis í dag af Ásthildi Lóu Þórsdóttur. Guðmundur Ingi segist reiðubúinn til að takast á við verkefnin í ráðuneytinu þó hann vildi að aðstæðurnar væru öðruvísi. Við förum yfir daginn í kvöldfréttum Stöðvar 2.

Fjölmargir greiddu borgarstjóra Istanbúl atkvæði í prófkjöri flokks hans, þar sem verið er að velja næsta forsetaframbjóðanda flokksins. Það er þrátt fyrir að hann hafi verið úrskurðaður í gæsluvarðhald og ákærður fyrir spillingu. Hann er helsti andstæðingur forseta landsins og fjölmargir hafa mótmælt handtökunni.

Loftslagssérfræðingur segir mikinn missi af kolefnisförgunarstöð Coda Terminal í Straumsvík, sem Carbfix hætti við að byggja upp vegna andstöðu íbúa. Hann hefur áhyggjur af því hve litla athygli loftslagsmálin fá í umræðunni.

Við kíkjum austur á Sólheimasand, þar sem frægasta flugvélaflak landsins er geymt. Flakið er að tærast upp og til stendur að skipta því út fyrir gamlan Flugfélagsþrist.

Það er nóg um að vera í íþróttunum. Strákarnir okkar etja nú kappi við Kósovó á Spáni.

Þetta og margt fleira í kvöldfréttum Stöðvar 2 klukkan hálf sjö.