„Við erum engir gæludýrahatarar“

Sæki samantekt...

Frumvarp Ingu Sæland, félags- og húsnæðismálaráðherra, um að rýmka fyrir dýrahaldi í fjölbýlishúsum á að liðka fyrir hunda- og kattahaldi, og jafna aðstöðu dýraeigenda eftir búsetuformi. Í frumvarpinu segir að í Danmörku, Noregi, Svíþjóð og Finnlandi sé dýrahald leyft í fjölbýli nema sérstakar ástæður mæli gegn því. Lagt er til að hunda- og kattahald í fjöleignarhúsi sé ekki háð samþykki annarrra eigenda. Áfram er þó gert ráð fyrir að húsfélög geti bannað dýrahald ef það veldur miklu ónæði eða ama svo sem astma og ofnæmi. Með breytingunni yrði Húsfélagið þó að afla atkvæða hjá tveimur þriðja hluta íbúanna fyrir því að banna dýrið í húsinu.

Fríða Rún Þórðardóttir, formaður Astma- og ofnæmisfélags Íslands, segir alla vilja að umræðan verið málefnaleg.

„Við viljum auðvitað ræða þetta á mannlegum nótum. Við erum engir gæludýrahatarar eða neitt slíkt en við viljum auðvitað standa með okkar fólki. Yfir það heila, við hvetjum náttúrlega bara til þess að það verði yfirveguð umræða um þetta, það verði víðtækt samráð allra sem eiga hagsmuna að gæta í þessum málaflokki.“

Fríða bendir á að Félag ofnæmis- og ónæmislækna séu einnig alfarið á móti slíkum breytingum enda yrðu astma og ofnæmissjúkir í gríðarlega vondri stöðu með sitt heilsufar yrðu reglur rýmkaðar.

„Við þurfum bara að ræða þetta á skynsemisnótum og finna leiðir til að við getum bara öll búið saman í friði og ró,“ segir Fríða.