Kristrún: Fáheyrt að vinna svona hratt

Sæki samantekt...

Kristrún Frostadóttir forsætisráðherra segir að á fyrstu 100 dögum ríkisstjórnarinnar hafi bæði gengið hratt og vel að afgreiða mál úr ríkisstjórninni og til þingsins. Af alls 81 frumvarpi, sem hafi verið sett í þingmálaskrá, séu 70 þeirra komin til þingsins.

„Það er stór dagur í dag, hundrað daga verkstjórn, og svona til marks um það þá hefur gengið alveg ofboðslega hratt og vel að afgreiða mál út úr ríkisstjórninni og inn í þingið,“ sagði Kristrún á blaðamannafundi sem hún boðaði til eftir hádegi ásamt leiðtogum ríkisstjórnarflokkana, þeim Þorgerði Katrínu Gunnarsdóttur utanríkisráðherra og Ingu Sæland, félags- og húsnæðismálaráðherra.

Á fundinum var farið yfir fyrstu 100 daga ríkisstjórnarinnar og þær áherslur sem birtast í fjármálaætlun til næstu fimm ára.

Mörg stór mál

Kristrún benti á að 81 frumvarp hefði verið sett í þingmálaskrána „og eftir daginn í dag þá verða sjötíu mál komin inn til þingsins. Og fjöldinn allur af stórum málum þarna og von á enn þá fleirum í vikunni. Og þetta, myndi ég segja, þó að sumir hafi meiri reynslu af þessu en ég, er fáheyrt að okkur takist að vinna svona hratt.“

Kristrún vék einnig að fjármálaáætlun til fimm ára sem var lögð fram í morgun. Það sé áætlun um öryggi og innviði landsins. Hún taki mið af því að þjóðin lifi á breyttum tímum.

Verða að geta brugðist við áföllum

„Á nokkrum vikum þá hafa orðið mjög miklar sviptingar á alþjóðasviðinu og það er miklu mikilvægara en áður, þó að það hafi auðvitað alltaf verið mikilvægt, en miklu mikilvægara en áður að undirstöðurnar hérna heima séu sterkar svo við getum brugðist við áföllum. Innviðirnir verða að vera sterkir, ríkissjóður verður að vera sjálfbær, heimilin verða að vera fjárhagslega trygg og svo þurfum við líka bara almennt að huga að öryggisvitund þjóðarinnar og vörnum landsins. Og það er útgangspunkturinn í þessari fjármálaáætlun.“

Þá benti Kristún á að ríkisstjórnin hafi þegar á þessum 100 dögum tekið bæði stórar og erfiðar ákvarðanir til að tryggja fyrrgreinda stöðu.

Hallalaus fjárlög voru ekki í augsýn

„Fjármálaráðherra fór yfir í morgun að við ætlum að skila hallalausum fjárlögum 2027. Þetta er ári fyrr en upphafsmarkmið fyrri ríkisstjórnar. Og svo ég tali nú bara hreina íslensku, þegar við tókum við stjórn hérna fyrir áramót þá voru hallalaus fjárlög ekki í augsýn. Það var bara það mikið af ófjármögnuðum loforðum sem höfðu verið lögfest af hálfu síðustu ríkisstjórnar sem höfðu skilað sér í því að þetta var einfaldlega ekki í augsýn,“ sagði ráðherra.

Kristrún benti enn fremur á að búið væri að taka upp nýtt verklag, eins og fjármálaráðherra hafði farið yfir í morgun, það er að segja að það væru engar óútfærðar aðhaldsráðstafanir í áætluninni.

Komið í veg fyrir flatt aðhald

„Þetta þýðir einfaldlega að við erum búin að finna ábyrgð hvers og eins ráðuneytis á stökum verkefnum í hagræðingu til að tryggja að af þeim verði og koma í veg fyrir að við förum í flatt aðhald sem skilar sér mjög oft í því að það er vegið á fjárfestingu og þess háttar, og það viljum við alls ekki.“