Björgunarsveitarfólki ógnað með byssu

Sæki samantekt...

Björgunarsveitarmönnum sem unnu að rýmingu Grindavíkurbæjar í morgun vegna yfirvofandi eldgoss var ógnað af fólki sem ekki vildi yfirgefa bæinn. Samkvæmt heimildum fréttastofu var þeim ógnað með byssu.

Björgunarsveitarfólkið þáði áfallahjálp frá Rauða Krossi Íslands eftir atvikið. Jón Þór Víglundsson, upplýsingafulltrúi Landsbjargar, segist hafa heyrt af því að fólki hafi verið ógnað en vísar annars á lögreglu.

Átta einstaklingar neituðu að yfirgefa Grindavík í morgun og ákváðu að vera eftir. Úlfar Lúðvíksson, lögreglustjóri á Suðurnesjum, sagði lögregluna ekki þvinga fólk til að rýma og þekkt sé að einhverjir taki þessa afstöðu við rýmingu.

Helena Rós Sturludóttir, samskiptastjóri Ríkislöreglustjóra, staðfestir í samtali við fréttastofu að björgunarsveitarmönnum hafi verið ógnað með skotvopni og að sérsveit ríkislögreglustjóra hafi verið kölluð til. Hún segir ekki hægt að veita frekari upplýsingar að svo stöddu.