Aukin spenna vegna æfinga kínverska hersins við strendur Taívan

Sæki samantekt...

Stjórnvöld í Taívan segja að fjöldi herflugvéla og herskipa kínverska hersins séu við æfingar við eyjuna. Kínverski herinn segist í yfirlýsingu hafa líkt eftir árásum á mikilvægar hafnir og orkuinnviði í Taívan.

Æfingin í dag er sögð vera stigmögnun á æfingu sem herinn var með í gær í kringum Taívan. Stjórnvöld í Kína hafa löngum gert tilkall til eyjunnar og viljað ná yfirráðum þar.

Donald Trump, Bandaríkjaforseti, hefur fordæmt heræfingarnar og bandaríska utanríkisráðuneytið ítrekaði í morgun stuðning Bandaríkjanna við stjórnvöld í Taívan.

Æfingar kínverska hersins hafa að mestu farið fram í mið- og suðurhluta Taívansunds. Sundið er mikilvæg siglingarleið fyrir alþjóðlega vöruflutninga.

Kínverskt yfirráðasvæði eða sjálfstæð eyja?

Stjórnvöld í Taívan telja Taívan vera sjálfstætt ríki en kínversk stjórnvöld líta á eyjuna sem hérað innan landsins, og á stjórnvöld í Taívan sem aðskilnaðarsinna.

Íbúar Taívan kjósa sína eigin leiðtoga og ríkisstjórn þess stjórnar skilgreindu landsvæði með eigin her, vegabréfi og gjaldmiðli. Landið nýtur í raun sjálfstæðis þótt að sjálfstæði þess sé ekki formlega viðurkennt af flestum löndum.

Stjórnvöld í Bandaríkjunum hafa stutt sjálfstæði Taívan.

Samskipti kínverskra stjórnvalda við stjórnvöld í Taívan hafa súrnað undanfarin ár. Lai Ching-te, forseti Taívan, sagði á dögunum að Kína væri fjandsamlegt, erlent afl. Stjórnvöld í Kína kölluðu Lai þá aðskilnaðarsinna.

Frá því að Lai tók við embætti forseta í maí 2024 hefur spennan milli Taívan og Kína magnast.