Serbneskir mótmælendur hjóla til Strassborgar í leit að hjálp

Sæki samantekt...

Þátttakendur í stúdentamótmælunum í Serbíu hyggjast hjóla 1.300 kílómetra leið á reiðhjólum alla leið til Strassborgar til að leita sér hjálpar hjá Evrópusambandinu.

Um 80 stúdentar lögðu af stað í gær frá Novi Sad og er áætlað að þeir hjóli um 100 til 150 kílómetra á dag. Leið þeirra liggur gegnum Ungverjaland, Austurríki og Þýskaland uns þeir koma til Strassborgar í Frakklandi. Þar vilja stúdentarnir vekja athygli Evrópuþingsins, sem er með höfuðstöðvar í borginni. Þeir hyggjast einnig heimsækja höfuðstöðvar Evrópuráðsins, sem er ótengt ESB, í borginni.

Stúdentarnir telja að Evrópusambandið hafi hunsað baráttuna sem mótmælendur í Serbíu heyi nú gegn spillingu og ranglæti. Fjöldamótmæli gegn stjórnvöldum hafa staðið yfir í landinu frá því í nóvember eftir að fimmtán manns létust þegar þak lestarstöðvar hrundi yfir þá. Mótmælendur telja slysið, og viðbrögð stjórnvalda við mótmælunum, dæmi um spillingu og valdboðshneigð ríkisstjórnar Aleksandars Vučić forseta.

Háskólanemar hafa verið áberandi í mótmælunum og hafa staðið fyrir setumótmælum í mörgum háskólum landsins.

„Já, þetta verður erfitt og við þurfum að leggja hart að okkur, en ég held að það verði þess virði,“ sagði Ivan Poturica stærðfræðinemi við fréttastofu AP. „Við búumst við því að einhver bregðist loksins við ástandinu í Serbíu.“