Af hverju er Trump með menntamál á heilanum?

Sæki samantekt...

Donald Trump, Bandaríkjaforseti, skrifaði í gærkvöldi undir forsetatilskipun um að Menntamálaráðuneyti Bandaríkjanna yrði lagt niður. Ákvörðunin kemur ekki á óvart enda hafa Trump og fylgismenn hans fundið ráðuneytinu flest til foráttu og sagði forsetinn að tímabært væri að hvert og eitt ríki sæi um sín menntamál.

Bent hefur verið á að aðeins hafi verið um pólitískt leikrit að ræða enda hefur Trump ekki þau völd að geta lagt heilt ráðneyti niður. Það er á forræði Bandaríkjaþings og ólíklegt að tilskipunin fljúgi í gegn þar. Trump hefur hins vegar gripið til margvíslegra aðgerða til að takmarka starfsemi ráðuneytisins, til að mynda segja upp meira en helmingi starfsfólks ráðuneytisins og skrúfa fyrir ýmsa styrki til þess.

Þá klóruðu stjórnmálaspekingar sér í kollinum yfir því að á sama tíma og Trump lýsti því yfir að ráðuneytið yrði lagt niður þá sagði hann að það myndi áfram sinna ákveðnum verkefnum.

En hvers vegna eru Trump og Repúblikanar á hans bandi með menntamálin á heilanum? CNN tók saman umfjöllun um þetta atriði og þar kom fram að Trump sjái ráðuneytið og helstu háskóla landsins sem gróðrastíu frjálslyndra viðhorfa og nánast útungunarstöð aktívista sem séu á móti flestum athöfnum forsetans. Þar ræður woke-hugsunarhátturinn ríkjum sem er eitur í beinum Trump.

Takmarkið er því að draga úr tjáningafrelsi Bandaríkjamanna þó að Trump flaggi því reglulega að fátt sé honum hugleiknara.

Óttast margir menntamenn í Bandaríkjum að aðgerðir Trump muni eyðileggja það orðspor sem fer af mörgum bandarískum háskólum sem taldir eru með þeim bestu í heimi.

Þá eru aðgerðir Trump sagðar minna á aðgerðir einræðisherra í öðrum löndum. Eitt fyrsta verk Vladimir Pútín, Rússlandsforseta, þegar hann settist á valdastól var að draga úr áhrifum Vesturlanda í rússneskum háskólum og stemma stigu við uppgangi frjálsyndra viðhorfa. Þá hefur Viktor Orban, forseti Ungverjalands og góðvinur Trump, verið í sömu baráttu í heimalandinu.

Skoðanakannanir í Bandaríkjunum sýna að um tveir þriðju kjósenda séu á móti aðgerðum Trump varðandi áðurnefnt ráðuneyti og því verður fróðlegt að sjá hvernig málin þróast á næstu vikum og mánuðum.