Óvissa um tollaáætlanir Trump veldur titringi í við­skiptalífinu

Sæki samantekt...

Óstöðug stefna Donalds Trump Bandaríkjaforseta í efnahagsmálum og síbreytileg skilaboð um tolla hafa vakið áhyggjur meðal viðskiptaleiðtoga, þingmanna Repúblikana og jafnvel innan Hvíta hússins sjálfs.

Aðstoðarmenn forsetans hafa undanfarið orðið fyrir flóðbylgju símtala frá forstjórum og hagsmunaaðilum sem krefjast meiri fyrirsjáanleika í tollamálum til að róa fjármálamarkaði og viðskiptalíf.

Á mánudag fundaði Trump með æðstu stjórnendum tæknifyrirtækja á borð við IBM, Qualcomm og HP í Roosevelt-sal Hvíta hússins.

Samkvæmt heimildum The Wall Street Journal lýstu sumir forstjóranna áhyggjum sínum af tollastefnu forsetans og bentu á að hún gæti skaðað atvinnugreinina. Trump hélt því þó fram að fundargestir hefðu rætt fjárfestingar í Bandaríkjunum.

Áhyggjur hafa einnig vaknað á meðal þingmanna Repúblikana sem telja að Trump hafi ekki heildstæða efnahagsáætlun.

Fjármálaráðherra Bandaríkjanna, Scott Bessent, lýsti því nýlega yfir að efnahagslífið þyrfti á „afeitrun“ að halda.

Trump hefur viðurkennt að tollar gætu haft neikvæð áhrif á neytendur og lét hafa eftir sér í viðtali á sunnudag að tollastríðið gæti leitt til kreppu. Ummæli forsetans höfðu neikvæð áhrif á fjármálamarkaði og urðu miklar lækkanir á hlutabréfamörkuðum á mánudag.

Sjá einnig]] Meiri þolinmæði fyrir lækkunum en áður: „Afteitrunar-tímabil“

Ósamræmi veldur spennu innan Hvíta hússins

Trump og ráðgjafateymi hans hafa ítrekað gert skyndibreytingar á tollastefnunni með undanþágum og afturköllun á áður boðuðum aðgerðum. Þetta hefur valdið spennu innan Hvíta hússins, þar sem sumir efnahagsráðgjafar forsetans óttast að óvissan um tollastefnuna hafi neikvæð áhrif á markaði og verðlagningu á hrávöru eins og orku og byggingarefnum.

Howard Lutnick, viðskiptaráðherra og fyrrverandi forstjóri Cantor Fitzgerald, hefur leitt umfangsmikla tollastefnu Trump og er reglulegur gestur í sjónvarpsviðtölum þar sem hann útskýrir stefnu stjórnvalda.

Hins vegar hafa aðrir í efnahagsteymi forsetans, þar á meðal Kevin Hassett, yfirmaður Þjóðhagráðsins, og Jamieson Greer, viðskiptaráðherra, oft verið útilokaðir frá stefnumótunarferlinu.

Heimildir WSJ herma að þetta hafi leitt til ringulreiðar innan stjórnkerfisins, eins og þegar Lutnick tilkynnti í sjónvarpi að Kanada og Mexíkó gætu komist hjá 25% tollum gegn því að takast á við fentanýlsmygl, án þess að aðrir embættismenn hefðu verið upplýstir.

Sjá einnig]]“ Megináhyggjuefnið er að sjálfsögðu mögulegir tollar á íslenskar vörur“

Repúblikanar áhyggjufullir

Á meðan efnahagsteymi forsetans tekst á við innri átök, vex óánægja meðal þingmanna Repúblikana.

Mike Rounds öldungadeildarþingmaður frá Suður-Dakóta lýsti óánægju með stefnuna og sagði að óvissan væri „mjög pirrandi“ fyrir bændur og fyrirtæki í hans ríki.

Thom Tillis, öldungadeildarþingmaður frá Norður-Karólínu, sagði að ruglingsleg og ósamræmd stefna væri farin að hafa áhrif á hlutabréfamarkaði og viðskiptalífið. „Fyrirtæki hata óvissu,“ sagði hann.

Þrátt fyrir aukinn þrýsting virðist Trump ákveðnari en nokkru sinni fyrr að fylgja eftir tollastefnu sinni. Í fyrri forsetatíð sinni fylgdist hann grannt með hlutabréfamörkuðum og mildaði stefnu sína ef verð féll.

Nú virðist hann síður tilbúinn til að bakka, þó að hann hafi dregið úr hörðum aðgerðum í sumum tilfellum. Þess í stað er áhersla lögð á markvissari tolla með undanþágum fyrir lykilatvinnugreinar.

Trump hyggst tilkynna nýja gagnkvæma tollastefnu í apríl, sem byggist á jöfnum tollum gagnvart löndum sem leggja tolla á bandarískar vörur. Hins vegar getur tekið sex mánuði eða lengur að innleiða slíka stefnu, samkvæmt heimildum.

Á meðan beðið er eftir skýrari stefnumörkun heldur óvissan áfram að valda óróleika á mörkuðum og í viðskiptalífinu.

Sjá einnig]] Trump hættir við að tvöfalda tollana á Kanada