Framkoma Bandaríkjamanna vegna Grænlands „dapurleg“

Sæki samantekt...

„Mér finnst framkoma Bandaríkjanna að einhverju leyti þegar kemur að Grænlandi, mér finnst hún vera frekar dapurleg. Bæði Danmörk og Bandaríkin hafa verið og eru í NATO, þetta eru bandamenn í gegnum áraraðir og hafa átt gott samstarf í gegnum árin.“ Þetta segir Þorgerður Katrín Gunnarsdóttir utanríkisráðherra í samtali við fréttastofu

„Það verður aldrei nógu oft sagt að það á virða fullveldi ríkja. Það á að virða alþjóðalög. Við Íslendingar eigum allt okkar undir því að svo sé gert. Þannig að þetta er kannski frekar dapurleg þróun,“ segir Þorgerður. Hún segir vini eiga að ræða málin í stað þess að eiga í óþarfa átökum.

Í morgun sagði Lars Løkke Rasmussen, utanríkisráðherra Danmerkur, að Danir kærðu sig ekki um tóninn í máli Bandaríkjamanna. Þar brást Rasmussen við orðum J.D. Vance, varaforseta Bandaríkjanna sem sagði Dani ekki hafa reynst grænlensku þjóðinni vel. Rasmussen sagði Danmörku ekki hafna yfir gagnrýni í málefnum Grænlands en svona ættu Bandaríkjamenn ekki að tala við náinn bandamann.

Tugir mótmæltu heimsókn bandarískrar sendinefndar til Grænlands fyrir utan Bandaríska sendiráðið í Kaupmannahöfn í dag.

Samband Íslands og Bandaríkjanna gott

Spurð að því hvað íslensk stjórnvöld geti gert í málefnum Grænlands, segir Þorgerður:

„Fyrst og síðast ávallt að undirstrika það að það er ekkert um Grænland án Grænlendinga. Það náttúrlega hefur ekki breyst hjá okkur. Það er frekar að þunginn er að aukast hjá okkur öllum norðurlandaþjóðunum, það er mikið samtal á milli okkar, ekki síst þessa dagana.“

Hún segir samband Íslands og Bandaríkjanna ekki hafa breyst.

„Samband Íslands við Bandaríkin hefur verið gott. Það er ekkert sem bendir til þess að það samstarf og það vinarþel sé nokkuð að breytast. Það er gott á milli þjóðanna.“

Fjölga þarf stoðum undir varnir og öryggi landsins

Hún segir varnarsamninginn milli Íslands og Bandaríkjanna enn vera aðra af tveimur stoðum í vörnum landsins ásamt aðildinni að NATO. Þeim stoðum þurfi að fjölga.

„Það gerum við með tvíhliða samstarfi við þjóðir eins og Kanada, Noreg, Bretland og við Evrópusambandið.“

Þorgerður segir vinnu þverpólitískrar þingmannanefndar við varnar- og öryggisstefnu að hefjast.

„Fyrst og síðast þá þurfum við Íslendingar að vera undirbúnir. Við þurfum að vera á varðbergi og vinna heimavinnuna okkar og það erum við einmitt að gera,“ segir Þorgerður Katrín Gunnarsdóttir utanríkisráðherra.