31 látinn í árásum Bandaríkjamanna á Jemen

Sæki samantekt...

Donald Trump Bandaríkjaforseti fyrirskipaði loftárásir á yfirráðasvæði Húta í Jemen í dag. Minnst 31 var drepinn í árásunum og 101 særðist, að sögn heilbrigðisyfirvalda, meðal annars í höfuðborginni Sanaa. Árásirnar eru umfangsmesta hernaðaraðgerð á seinna kjörtímabili Trump til þessa. Hútar eru hliðhollir Hamas-samtökunum á Gaza.

Erlendir miðlar hafa eftir íbúum Sanaa að árásirnar hafi beinst að byggingum við þekktar bækistöðvar Húta.

Ráðamenn í Bandaríkjunum segja árásirnar fyrsta skref forsetans í átt að því að opna fyrir siglingarleiðir um Rauðahafið á ný. Stjórnmálavængur Húta kallaði árásirnar stríðsglæp og hét því að þeim yrði svarað.

Bandarískir embættismenn segja við The New York Times að árásirnar séu upphaf nýrrar sóknar gegn Hútum. Búast megi við frekari árásum á næstu vikum. Þeim sé einnig ætlað að senda skýr skilaboð til Íran. Trump hefur sóst eftir því að semja við Írani um kjarnorkumál.

Hann sagði á samfélagsmiðlinum Truth Social í dag að Bandaríkjamenn myndu bregðast við ef Íranir hættu ekki að styðja Húta. Utanríkisráðherra Íran sagði á móti að Bandaríkjamenn hefðu enga heimild til afskipta af utanríkismálum Írana. Hann brýndi fyrir Bandaríkjamönnum að hætta árásum á Jemen.

Yfir 100 árásir Húta á Rauðahafi

Frá því að stríð braust út á Gaza í október 2023 hafa Hútar gert yfir hundrað árásir á flutningaskip á siglingu um Rauðahaf, sem þeir segja tengjast Ísraelsríki. Tveimur skipum hefur verið sökkt síðan þá og fjórir skipverjar drepnir.

Árásirnar hafa haft töluverð áhrif á skipaflutninga um Rauðahaf og fyrirtæki hafa því forðast að senda skip um Rauðahaf. Hundruð skipa hefur því í staðinn verið siglt um töluvert lengri leið meðfram ströndum Suður-Afríku.

Bandaríkjamenn og Bretar hafa brugðist við með því að gera árásir á bækistöðvar og herstöðvar Húta í Jemen. Það varð þó ekki til þess að draga úr árásum Húta. Þeim linnti ekki fyrr en samið var um vopnahlé á Gaza.

Nýverið hétu Hútar því að hefja árásirnar á nýjan leik eftir að Ísrael stöðvaði flutning hjálpargagna til Gaza, þegar Hamas féllst ekki á að fresta seinni áfanga vopnahlésins.

Trump sagði að stjórn hans myndi bregðast við af meira afli en stjórn Joes Biden, forvera hans.

Fréttin hefur verið uppfærð ásamt fyrirsögn eftir að fregnir bárust um frekara mannfall.