ETA nú nauðsynlegt fyrir ferðalög til Bretlands

Sæki samantekt...

Frá og með deginum í dag þurfa íslenskir ríkisborgarar að sækja um rafrænt ferðaleyfi, ETA (Electronic travel authorisation), áður en haldið er til Bretlands. Þetta á líka við um þá sem aðeins þurfa að millilenda í landinu á ferðalagi út í heim.

Fram kemur á heimasíðu íslenska sendiráðsins í London að ETA gildi í tvö ár frá útgáfudegi eða þar til vegabréf viðkomandi rennur út, ef það gerist fyrr. Leyfið kostar 10 pund.

„Auðveldast er að sækja um ETA með „UK ETA app“ smáforriti, fyrir iPhone og Android síma, en einnig er hægt að sækja um á vefsíðu breskra stjórnvalda, GOV.UK.“

Sendiráðið bendir á að þeir sem ætla að dvelja lengur en í sex mánuði í Bretlandi þurfi að sækja um viðeigandi dvalarleyfi, ekki dugi að hafa ETA. Þeir sem nú þegar hafa dvalarleyfi í Bretlandi þurfa ekki ETA til þess að ferðast til landsins.