Tals­maður Pútíns hrósar Rubio fyrir um­mæli um leppastríð

Sæki samantekt...

Dmitrí Peskóv, talsmaður Vladimírs Pútín, forseta Rússlands, segir ummæli Marcos Rubio, utanríkisráðherra Bandaríkjanna, um að innrás Rússa í Úkraínu sé leppastríð milli Bandaríkjanna og Rússlands, vera alfarið í takt við viðhorfa yfirvalda í Kreml og sérstaklega í takt við viðhorf Pútíns. Þessu hefðu Rússar ítrekað haldið fram.

Rubio sagði í gær að binda þyrfti enda á stríðið í Úkraínu, var það eftir að Donald Trump, forseti, stöðvaði hernaðaraðstoð handa Úkraínumönnum. Hann stöðvaði einnig samstarf Bandaríkjamanna með Úkraínumönnum þegar kemur að eftirliti og upplýsingastreymi á víglínunni, sem reynst hefur Úkraínumönnum verulega mikilvægt.

Meðal annars gerir breytingin Úkraínumönnum erfiðara að verjast ítrekuðum og umfangsmiklum eldflauga- og drónaárásum Rússa og að gera árásir gegn Rússum bakvið víglínuna.

Sjá einnig: Ákvörðuninni líkt við eftirgjöf bandamanna gagnvart Hitler

„Það hefur verið ljóst frá upphafi að Trump lítur á þetta sem langvarandi átök í pattstöðu,“ sagði Rubio í viðtali í gærkvöldi og bætti hann svo við:

„Hreint út sagt, er þetta leppastríð milli tveggja kjarnorkuvelda. Bandaríkjanna, sem hjálp Úkraínu, og Rússa og það þarf að enda.“ Þá gagnrýndi hann Úkraínumenn og Evrópumenn fyrir að hafa enga áætlun til að binda enda á innrás Rússa.

Úkraínumenn segjast ekki berjast fyrir Bandaríkin, heldur séu þeir að berjast fyrir tilvist þeirra og lýðræði.

Peskóv sagði í morgun, samkvæmt frétt Reuters, að ummæli Rubios væru alfarið í samræmi við afstöðu Rússa og þeir hefðu ítrekað haldið þessu fram. Þeir væru einnig sammála um að binda þyrfti enda á „átökin og þetta stríð“, sem er innrás Rússa.

Þrýsta á Úkraínu en ekki Rússland

Trump-liðar hafa verið harðlega gagnrýndir í Evrópu og víðar fyrir aðgerðir sínar vegna innrásarinnar undanfarna daga og fyrir mikla kúvendingu í utanríkisstefnu Bandaríkjanna varðandi Rússland. Bandaríkjamenn hafa beitt Úkraínu miklum þrýstingi en lítið sem ekkert gengið á Rússa og þess í stað ítrekað talað máli Rússa og Pútíns.

Sjá einnig: Hegseth fyrirskipar hlé á netaðgerðum gegn Rússum

Bandaríkjamenn hafa beitt Úkraínumenn gífurlegum þrýstingi og hætt áðurnefndri aðstoð. Þá hafa borist fregnir af því í morgun að Trump ætli sér að binda enda á vernd úkraínskra flóttamanna í Bandaríkjunum, svo auðveldara sé að vísa þeim úr landi.

Einnig sagði Politico frá því að ráðgjafar Trumps hafi átt í viðræðum við pólitíska andstæðinga Vólódimírs Selenskí, forseta Úkraínu. Fjórir Trump-liðar hefðu átt í leynilegum viðræðum við nokkra af leiðtogum stjórnarandstöðunnar í Úkraínu og sneru þær meðal annars að því hvort hægt væri að halda skyndikosningar í Úkraínu.

Trump hefur kallað Selenskí einræðisherra og básúnað rússneskum áróðri um að úkraínski forsetinn neiti að halda kosningar.

Ráðamenn í alræðisríkinu Rússlandi hafa ítrekað haldið því fram að hann sé umboðslaus þar sem hann er ekki búinn að halda nýjar kosningar, þar sem kjörtímabili hans ætti að vera lokið.

Stjórnarskrá heimilar ekki kosningar á stríðstímum

Stjórnarskrá Úkraínu heimilar ekki kosningar á meðan herlög eru í gildi í Úkraínu, sem þau eru vegna innrásar Rússa, og Úkraínumenn segja að það að halda kosningar yrði gífurlega erfitt með tilliti til átakanna, að stór hluti Úkraínu hafi verið hernuminn og að milljónir hafi flúið land. Fjölmargir kjósendur eru á víglínunni í Úkraínu og aðrir á hernumdum svæðum.

Nýjar kannanir sýna að vinsældir Selenskís í Úkraínu hafa aukist undanfarnar vikur, samhliða aðgerðum Trump-liða gegn honum. Þá sýna þær einnig að hann nýtur mun meira fylgis en þeir andstæðingar hans sem ráðgjafar Trumps hafa verið að ræða við.

Helsti pólitíski andstæðingur Selenskís þessa dagana er Valerí Salúsjní, fyrrverandi yfirmaður herafla Úkraínu og núverandi sendiherra í Bretalandi.

Salúsjní fór hörðum orðum um Trump og erindreka hans á fundi í Lundúnum í morgun. Þar sagði hann meðal annars að Trump væri í samfloti með Pútín og að þeir saman væru að „rústa“ alþjóðakerfinu.

Hann sagði að það að Bandaríkjamenn gætu ekki skilgreint innrás Rússa í Úkraínu sem ofstopa eða árás væri gífurlega áskorun fyrir heiminn og sérstaklega Evrópu.]]“ Við sjáum að þetta er ekki bara að öxulveldi hins illa og Rússland að reyna að breyta alþjóðakerfinu, heldur eru Bandaríkin að rústa þessu kerfi.“ [[Þetta sagði Salúsjní. Hann sagði einnig að aðgerðir Trumps undanfarna daga sýndu að hann væri að stilla sér við hlið Rússlands og varaði við því að haldi Bandaríkin þessari stefnu gæti Atlantshafsbandalagið heyrt sögunni til á næstu árum.

Þurfa langvarandi frið og öryggi

Úkraínumenn hafa ítrekað sagt að friðarsamkomulagi þurfi að fylgja góðar og bindandi öryggistryggingar, til að tryggja að Rússar verji ekki næstu árum í að byggja upp heri sína á nýjan leik og gera aðra innrás.

Selenskí hefur varað við því að án aðkomu Bandaríkjanna eigi ríki Evrópu erfitt með að veita Úkraínumönnum góðar öryggistryggingar.

Án slíkra ráðstafana er, eins og áður hefur komið fram, fátt sem kemur í veg fyrir að Rússar byggi upp her sinn að nýju á nokkrum árum og geri aftur innrás í Úkraínu. Rússar væru í betri stöðu en Úkraínumenn til að byggja upp efnahag sinn og her á nýjan leik, vegna þeirra miklu skemmda sem árásir Rússa hafa valdið í Úkraínu.

Erfitt gæti verið fyrir Úkraínu að stöðva aðra innrás við slíkar kringumstæður.

Úkraínumenn óttast líka að án góðra öryggistrygginga muni reynast erfitt að fá þá fjölmörgu Úkraínumenn sem hafa flúið land aftur heim.

Ráðamenn í Rússlandi segja að þeir muni aldrei sætta sig við hermenn annarra ríkja í Úkraínu, til að tryggja frið þar. Sergei Lavrov, utanríkisráðherra, ítrekaði það í morgun og gagnrýndi Emmanuel Macron, forseta Frakklands, og Keir Starmer, forsætisráðherra Bretlands, fyrir að leggja fram ætlanir um slíkt.

„Við sjáum ekki neitt rými til málamiðlana varðandi það,“ sagði Lavrov.