Haaland sakaður um að meiða lukkudýrið

Sæki samantekt...

Kona sem starfaði fyrir Manchester City og sá um að klæða sig upp sem lukkudýr félagsins, Moonbeam, sakar Erling Haaland um að hafa slegið sig í höfuðið þegar hún var í búningnum. Hún hafi þurft að fara á sjúkrahús og farið með málið til lögreglu.

Samkvæmt frétt Reuters hefur Manchester City hafnað ásökunum konunnar en þær komu fram í viðtali í The Sun.

Atvikið átti sér stað fyrir heimaleik City gegn Southampton í október. Konan sem klæddist búningi Moonbeam segist hafa verið í áfalli eftir að Haaland danglaði í höfuð hennar með „fjörugum“ (e. playful) hætti, þegar hún var að stilla sér upp í myndatöku.

„Ég var í nokkuð miklu uppnámi, grét og hausinn á mér skalf. Ég held ég hafi verið í áfalli,“ sagði konan við The Sun.

„Ég komst svo að því að hann hefði slegið mig í höfuðið og svo hallað sér ofan á mig,“ sagði konan. Hún hafi leitað til öryggisstjóra City sem hafi hlegið að málinu og sagt: „Þú getur þó sagt að Erling Haaland hafi slegið þig.“

Talsmaður City segir að búið sé að fullrannsaka málið og ekkert í rannsókninni styðji fullyrðingar konunnar

„Félagið rannsakaði málið að fullu og fann engar sannanir, þar á meðal myndbandsefni, sem studdu þá fullyrðingu að meiðsli hefðu orðið með þeim hætti sem haldið er fram. Okkur er einnig kunnugt um að tilkynnt hafi verið um málið til lögreglunnar í Manchester og að hún hafi ekki farið með málið lengra,“ segir talsmaður City.