Ber mál Le Pen saman við mál Flokks fólksins

Sæki samantekt...

Greint var frá því í fréttum í gær að franskur dómstóll hefur bannað Marine Le Pen, leiðtoga róttæka hægriflokksins Þjóðfylkingarinnar, að bjóða sig fram til opinberra embætta í fimm ár. Bannið tók þegar í stað gildi. Le Pen hafði hug á því að bjóða sig fram til forseta árið 2027 og dómurinn setur þau áform því í uppnám. Málið varðar fjárdrátt úr sjóðum Evrópuþings. Frosti Logason fer yfir málið og fyrirsagnir fjölmiðla í þætti sínum Harmageddon með yfirskriftinni Óæskilegum stjórnmálamönnum slaufað.

„Við ætlum að fara í fyrirsögn númer tvö. Áfram meiri sigur fyrir lýðræðið í Evrópu. Maður sá þessa fyrirsögn: Le Pen sakfelld fyrir fjársvik. Marine Le Pen sem er formaður það sem að þeir kalla harðlínu hægri flokksins, Þjóðfylkingarinnar. Það er áhugavert, einhvern veginn einhvers staðar núna á leiðinni þá hafa þeir ákveðið: Heyrðu, við verðum við ekki að hætta að kalla þetta öfgahægri og finna eitthvað nýtt? Og það er þá harðlínu hægri,“ segir Frosti.

Segist hann hafa skilið málið við fyrstu sýn að Le Pen væri að maka krókinn á því að vera í opinberu starfi.

„Nei nei, það er ekki hún, er ekki að hagnast á einu né neinu þarna. Heldur snýr þetta að því að Þjóðfylkingin fékk sem sagt peninga frá Evrópusambandinu sem átti að standa undir kostnaði við aðstoðarmenn þingflokks Þjóðfylkingarinnar á Evrópuþinginu, en í staðinn var peningurinn notaður til þess að greiða almennum starfsmönnum flokksins. Vá, svakalegt, svakalegt. Þetta er bara fjársvik.“

Segir Frosti að það sjáist langar leiðir hvað er að gerast þarna.

„Þarna er stjórnmálamaður sem er búinn að vera að sækja í sig veðrið og auka fylgi gríðarlega. Þjóðfylkingin er orðin með stærstu flokkunum í Frakklandi. Og hún hefur tilkynnt það að hún ætli að bjóða sig fram til forseta í Frakklandi árið 2027. En þessi sakfelling þýðir auðvitað það að Marine Le Pen er ekki heimilt lengur að bjóða sig fram til forseta.“

Segir Frosti að það sé ótrúlegt að sjá þessa niðurstöðu.

„Það er verið að taka stjórnmálamenn sem eru ekki þóknanlegir í elítunni, það er verið að kansela þeim og þá segir Egill Helgason: „Já, makalaust er að lesa ummæli um dóminn yfir Marine Le Pen og liðsmenn hennar. Þau eru dæmd fyrir stórfelldan fjárdrátt í þágu flokksins. Ljótur ferillinn á því sviði nær reyndar víðar. Því Þjóðfylkingin þáði peninga frá Pútín á sínum tíma.“ Fengum við ekki líka peninga frá Pútín þarna í hruninu? Einu ríkin sem að voru tilbúin til þess að aðstoða okkur fjárhagslega þegar að bankahrunið var hérna og allar lánalínur voru slitnar og Evrópusambandið vildi ekki hjálpa okkur og bandaríski seðlabankinn vildi ekki hjálpa okkur, þá var það sem sagt Rússland, Pólland og Færeyjar sem að buðust til þess að lána okkur peninga. En það er náttúrlega stór glæpur að þiggja það fé.“

Velta Frosti og Ingimar Elíasson, tæknimaður í Harmageddon því fyrir sér hvort að mál Le Pen sé ekki sambærilegt máli Ingu Sæland og Flokks fólksins. En flokkurinn fékk líkt og fleiri flokkar ríkisstyrki frá árinu 2022 þegar tekið var upp nýtt verklag við framlög úr ríkissjóði til þeirra. Flokkur fólksins var ekki skráður í sérstaka stjórnmálasamtakaskrá og fékk styrk árin 2022–2024. Píratar, Sjálfstæðisflokkur og Sósíalistaflokkurinn voru ekki skráðir með réttum hætti þegar fyrsta úthlutun var þann 31. janúar árið 2022 en skráning var síðar löguð. Í fréttum í byrjun febrúar kom fram að flokkunum yrði ekki gert að endurgreiða styrkina.

„Mér finnst þá að við gætum alveg dæmt Ingu Sæland í fangelsi fyrir. Á hún ekki bara að fara í jailið og má ekki bjóða sig fram. Þetta er stórfelldur fjárdráttur,“ segir Ingimar.

„Egill Helgason segir: Þetta er einfaldlega réttvísi og hún á að vera blind á hluti eins og stjórnmálahagsmuni. Því miður náði réttvísinni ekki utan um bankahrunið 2008 þegar í raun hefði átt að dæma fjölda fjármálamanna út um alla veröld. Heimurinn sýpur seyðið af því. Í fjármálageiranum ríkir allt of mikið refsileysi. Svo er dálítið skoplegt að þeir sem veina sárast undan dómnum yfir Marine Le Pen eru andstæðingar ESB. Það er eitthvað skoplegt.“

Þetta er svona endurtekið stef sem við sjáum í evrópskum stjórnmálum að þeir sem eru kallaðir harðlínuhægri eða popúlískir flokkar sem að vilja taka á brjálæðislegri útlendingastefnu eða landamæraleysi og svo framvegis, þeir eru bara teknir niður af þessari sömu elítu og ræður ríkjum þarna.“