Jair Bolsonaro fyrir rétt vegna valdaránstilraunar og áætlana um morð

Sæki samantekt...

Hæstiréttur Brasilíu ákvað í dag að réttarhöld fari fram yfir Jair Bolsonaro, fyrrum forseta landsins vegna tilraunar hans til valdaráns árið 2022. Þá er hann einnig sakaður um að hafa átt þátt í ráðabruggi um að myrða Lula da Silva, núverandi forseta Brasilíu.

Verði Bolsonaro fundinn sekur á hann yfir höfði sér meira en 40 ár í fangelsi.

Talið var líklegt að Bolsonaro stefndi á endurkomu í pólitík á næsta ári þegar þingkosningar fara fram í landinu. Allir fimm dómarar hæstaréttar Brasilíu kusu með því að réttað verði yfir Bolsonaro.

Réttað verður einnig yfir sjö öðrum sem taldir eru hafa lagt á ráðin um árásina ásamt Bolsonaro. Meðal þeirra eru Walter Braga Netto, þáverandi varnarmálaráðherra Brasilíu, og Paulo Sergio Nogueira de Oliveira, fyrrum yfirmaður sjóhers Brasilíu.

Ríkissaksóknari Brasilíu lagði nýverið fram ákæru á hendur Bolsonaro og á fjórða tug samverkamanna hans fyrir valdaránstilraun og ráðabrugg um að myrða núverandi forseta landsins eftir að Bolsonaro tapaði kosningunum naumlega. Þá hafi einnig verið áætlanir um að myrða hæstaréttardómarann Alexandre de Moraes, sem verður meðal dómara í máli Bolsonaro.

Tilraunin minnti mikið á það sem átti sér stað í Bandaríkjunum þann 6. janúar 2021 þegar stuðningsmenn Donald Trump réðust á þinghúsið í Washington. Þúsundir stuðningsmanna Bolsonaro réðust að forsetahöllinni í Brasilíu og kölluðu eftir að Lula da Silva yrði settur af um viku eftir að hann sigraði kosningarnar. Sjálfur var Bolsonaro í Flórída þegar árásin átti sér stað.

Saksóknarinn, Paulo Gonet Branco, segir Bolsonaro og Walter Braga Netto höfuðpaura í málinu. Þeir hafi ásamt hópi almennra borgara og hermanna bruggað launráð gegn lýðræðislegum stofnunum landsins.

Ákærendur í máli Bolsonaro segja að valdaránstilraun hans hafi mistekist þar sem hún naut ekki nægilegs stuðnings meðal stjórnenda hers Brasilíu.

Bolsonaro hefur ætíð svarið af sér sök og sagst fórnarlamb ofsókna af hálfu ríkisvaldsins.