Uppselt á landsleikinn — rétt yfir 1.000 manns á vellinum

Sæki samantekt...

Uppselt er á leik Íslands og Noregs í Þjóðadeild kvenna í fótbolta. Um tíma var tvísýnt hvort svo yrði þrátt fyrir að einungis rétt rúmlega 1.000 miðar væru í boði.

Leikið er á Þróttarvelli í Laugardal þar sem unnið er að endurbótum á Laugardalsvelli. Vonast er til þess að hann verði leikfær 3. júní þegar Ísland mætir Frökkum í síðasta heimaleik sínum í Þjóðadeildinni.

Áhorfendatölur á heimaleiki Íslands í undankeppni EM 2024:

1.152 manns. Ísland — Pólland. Leikið á Kópavogsvelli 5. apríl 2024.

2.067 manns. Ísland — Austurríki. Leikið á Laugardalsvelli 4. júní 2024.

5.243 manns. Ísland — Þýskaland. Leikið á Laugardalsvelli 12. júlí 2024.

IMAGO

Skandall í gær

Ekki var búið að selja alla þá miða sem í boði voru í gær og tóku Ingibjörg Sigurðardóttir fyrirliði og Þorsteinn Halldórsson þjálfari sterkt til roða.

„Það eru vonbrigði. Þetta er lítill völlur, lítil stúka, og við eigum að ná að selja upp á þennan leik á 5 mínútum, finnst mér. En þetta er bara staðan og við þurfum að sjá hvað við getum gert til að fá fólk til að vilja koma á völlinn og svo þarf fólk að vera tilbúið til að styðja okkur,“ sagði Ingibjörg.

Ísland fagnar sæti á EM með sigri á Þýskalandi á Laugardalsvelli. Mummi Lú

„Auðvitað velur fólk hvað það gerir og allt það. Ég lít samt á það sem mikil vonbrigði, það eru ekki það mörg sæti hérna á vellinum, mér finnst það eiginlega skandall að það sé ekki orðið uppselt,“ sagði Þorsteinn.

RÚV sýnir leikinn beint kl. 16:45 í dag. Ísland er með eitt stig eftir tvo leiki en Noregur er með þrjú stig.

Seinni leikur þessa landsliðsglugga er gegn Sviss og er þriðjudaginn 8. apríl klukkan 16:45. Enn eru miðar í boði á þann leik.

Miða má nálgast hér.