Sérhagsmunir Hönnu Katrínar

Sæki samantekt...

Viðreisn gefur sig út fyrir að vera stjórnmálaafl fólksins sem er of frjálslynt fyrir Sjálfstæðisflokkinn. Eitt helsta slagorð flokksins er: Almannahagsmunir framar sérhagsmunum.

Þegar allt kemur til alls þá er þetta slagorð orðin tóm. Hagsmunir MS eru framar hagsmunum íslenskra neytenda að mati ráðherra Viðreisnar — Mjólkursamsölunni allt!

Fram hefur komið í fréttum að Hanna Katrín Friðriksson, atvinnuvegaráðherra Viðreisnar, þrýsti á samflokksmann sinn, Daða Má Kristófersson fjármálaráðherra, um að láta af áformum sínum um að breyta tollflokkun pítsaosts íblönduðum jurtaolíu aftur til fyrra horfs.

Í stuttu máli snýst málið um ost sem er notaður á pítsur. Veitingamenn kjósa ekki að nota íslenskan ost þegar kemur að pítsugerð og almennri gratíneringu sem er auðvitað helsta kjölfesta íslenskrar matargerðarlistar. Eins og fram kom í umfjöllun Viðskiptablaðsins í síðustu viku kvarta þeir undan ítrekuðum gæðavandamálum íslenska ostsins á borð við myglu, stökkri áferð og litabreytingum.

© Aðsend mynd (AÐSEND)

Til þess að bregðast við þessu fóru þeir að flytja inn pítsaost sem stenst almennar gæðakröfur og viðmið í manneldismálum. Stjórnkerfið brást við þessu með því að breyta tollflokkaskráningu erlenda pítsaostsins þannig að hann ber nú ofurtolla. Evrópusambandið brást réttilega við þessu og setti Ísland á lista yfir ríki sem beita viðskiptahindrunum. Eftirlitsstofnun EFTA hefur málið jafnframt til skoðunar.

Við þessu ætlaði fjármálaráðherra að bregðast en varð að láta undan þrýstingi atvinnuvegaráðherra. Væntanlega sökum þess að almannahagsmunir krefjast þess að íslenskum neytendum sé boðið upp á vöru sem veitingamenn telja óboðlega.

Þarna er Hanna Katrín að taka sér stöðu við hlið Framsóknarmanna í baráttu sinni fyrir almannahagsmunum fram yfir sérhagsmuni. Ingibjörg Isaksen sagði um þetta mál á dögunum að ef áform fjármálaráðherra um að skrá innflutta ostinn í réttan tollflokk hefðu gengið eftir hefðu tugir kúabúa þurft að hætta starfsemi.

Týr bendir á hina augljósu staðreynd: Það er eitthvað verulega athugavert við atvinnugrein sem byggir starfsgrundvöll sinn á rangri tollflokkun í trássi við alþjóðasamninga og venjur.

Týr er einn af föstum ritstjórnardálkum Viðskiptablaðsins. Þessi birtist fyrst í blaðinu sem kom út 5. mars 2025.