Gagnrýna skamman frest til að skila inn umsögn við frumvarp um hækkun veiðigjalda

Sæki samantekt...

Samtök fyrirtækja í sjávarútvegi (SFS) ætla ekki að skila inn umsögn um frumvarp atvinnuvegaráðherra um hækkun á veiðigjaldi innan þess tímaramma sem er veittur. Frestur til að skila inn umsögn rennur út í dag.

Frumvarpið um hækkun veiðigjalda var kynnt af fjármálaráðherra og atvinnuvegaráðherra á blaðamannafundi í lok mars og hefur síðan þá legið í samráðsgátt stjórnvalda.

Í kynningu um frumvarpið segir að þar sé mælt fyrir um breytingu á skráðu aflaverðmæti í tilteknum nytjastofnum við útreikning veiðigjalds, þannig að það endurspegli betur raunverulegt aflaverðmæti og þar með réttlát auðlindagjöld fyrir aðgang að auðlindinni.

SFS segja óforsvaranlegt að hafa einungis fengið viku til umsagnar um svo veigamikið mál.

Ráðuneytið hafnaði framlengingu á umsagnarfresti

Í tilkynningu frá SFS segir að samtökin hafi óskað eftir hóflegri framlengingu á fresti til að skila inn umsögn um frumvarpið. Atvinnuvegaráðuneytið synjaði þeirri beiðni.

Í tilkynningunni er einnig gagnrýnt að ráðuneytið hafi kosið að svara ekki beiðni samtakanna um aðgang að undirliggjandi grunngögnum og útreikningum sem frumvarpið byggist á.

Þá er bent á að ráðuneytið hafi ekki lagt mat á möguleg áhrif frumvarpsins, verði það að lögum. Fyrirætlanir um tengingu við afurðir í öðru landi eru sagðar þarfnast frekari skoðunar en í frumvarpinu er gert ráð fyrir að miða aflaverðmæti uppsjávarafla við fiskmarkaði í Noregi.

Að mati samtakanna felst í því að skattskylda mun hvíla á sjávarútvegsfyrirtækjum á Íslandi vegna verðmæta sem þau hafa engan ráðstöfunarrétt yfir, það er afurðum á markaði í Noregi.

Í tilkynningunni segir að SFS muni birta og afhenda ráðuneytinu umsögn að viku liðinni, jafnvel fyrr, þó að umsagnarfrestur verði liðinn.