Ríkið tekur yfir málefni barna með fjölþættan vanda og styður uppbyggingu hjúkrunarheimila

Sæki samantekt...

Ríkið mun verja 3 milljörðum króna í málefni barna með fjölþættan vanda og mun taka að sér framkvæmd og ábyrgð á fjármögnun sérhæfðrar þjónustu við slík börn sem búsett eru utan heimilis. 1,5 til 2 milljörðum verður þá varið í uppbyggingu hjúkrunarheimila samkvæmt nýju samkomulagi ríkis og sveitarfélaga. Samkomulag þess efnis var undirritað í dag og taka breytingarnar gildi um mitt þetta ár. Þær eru liður í að einfalda verkaskiptingu milli ríkis og sveitarfélaga.

Daði Már Kristófersson fjármála- og efnahagsráðherra, Ásthildur Lóa Þórsdóttir mennta- og barnamálaráðherra, Heiða Björg Hilmisdóttir, formaður Sambands íslenskra sveitarfélaga, og Arnar Þór Sævarsson, framkvæmdastjóri Sambands íslenskra sveitarfélaga, undirrituðu samkomulagið sem sneri að málefnum barna með fjölþættan vanda.

RÚV/Ragnar Visage

„Mér finnst stærstu tíðindin vera að ríkið er að taka utan um börn með fjölþættan vanda og ætlar að byggja fyrir þau úrræði sem er þróað að þeirra þörfum,“ segir Heiða Björg.

„Þetta eru bara stór tíðindi fyrir börn og fjölskyldur sem á þessu þurfa að halda.“

Ábyrgðaskipting í málefnum barnanna er í samræmi við tillögur starfshóps á vegum félags- og vinnumarkaðsráðherra sem birtar voru í skýrslu í september 2024. Börn með fjölþættan vanda hafa jafnan miklar stuðningsþarfir og þarfnast meðal annars tímabundinnar vistunar utan heimilis þar sem veitt er meðferð vegna vanda barns.

Hraða uppbyggingu hjúkrunarheimila

Það voru þau Daði Már Kristófersson, fjármála- og efnahagsráðherra, Inga Sæland, félags- og húsnæðismálaráðherra, Alma Möller heilbrigðisráðherra, Heiða Björg Hilmisdóttir, formaður Sambands íslenskra sveitarfélaga, og Arnar Þór Sævarsson, framkvæmdastjóri Sambands íslenskra sveitarfélaga, sem undirrituðu samkomulag vegna uppbyggingar hjúkrunarheimila.

Samkvæmt samkomulaginu munu sveitarfélög ekki lengur bera 15% af stofnkostnaði hjúkrunarheimila og verður þeim heimilt að innheimta gatnagerðargjöld. Breytingunum er ætlað að flýta uppbyggingu hjúkrunarheimila.

RÚV/Ragnar Visage

Inga Sæland segir um tímamótasamning að ræða.

„Tímamótin felast fyrst og síðast í að nú ætlar ríkið sjálft að taka á sig kostnað við uppbyggingu hjúkrunarheimila í stað þess að sveitarfélögin hafi áður lögum samkvæmt verið skilyrt til að greiða 15%,“ segir hún.

Þegar sveitarfélög úthluta lóðum undir hjúkrunarheimili verður það áfram gert án lóðarleigu og án byggingarréttargjalda. Settur verður á fót stýrihópur sem falið verður að útfæra nánar skiptingu á eldri hjúkrunarheimilum milli ríkis og sveitarfélaga en gengið er út frá því að þar sem um sameiginlegt eignarhald ríkis og sveitarfélaga er að ræða muni eignarhlutur sveitarfélags í hjúkrunarheimilum færast yfir til ríkis, með sama hætti og þegar eignir ríkisins hafa færst til sveitarfélaga vegna breyttrar verkaskiptingar.

Vilja fækka gráum svæðum

Daði Már Kristófersson, fjármála- og efnahagsráðherra, segir að með breytingunum sé verið að fækka gráum svæðum í verkaskiptingu ríkis og sveitarfélaga. Enn sé eitthvað um grá svæði líkt og að ríkið móti menntastefnu á meðan sveitarfélögin sjái um rekstur grunnskóla. Þá nefnir hann einnig vegagerð og málefni fatlaðra þar sem óljóst sé hvort ríkið eða sveitarfélögin fari með stjórn.

RÚV/Ragnar Visage

„Gagnvart almenningi er hins vegar mikilvægt að fólk finni ekki hvort það sé í samskiptum við ríkið eða sveitarfélög,“ segir hann.

„Varðandi börn með fjölþættan vanda þá mun þetta gerast á þessu ári. Uppbygging hjúkrunarheimila er auðvitað viðvarandi verkefni svo það er ekki eins og sveitarfélögin og ríkið hafi ekki unnið saman að því en við vonumst til að geta aukið hraðann í þeirri uppbyggingu strax á þessu ári,“ segir Daði Már að lokum.